ವರುಷಗಳ ನೆನಪು

ವರುಷಗಳೇ ಕಳೆದರೂ ಹರುಷಗಳು ಸಾಲು ಸಾಲು

ಸಾಲದಾಗಿದೆ ಜೊತೆಯಾಗೋ ಸಾವಿರ ನೆನಪು

ಸವಿಯಾಗಿದೆ ಸರಿಯಾದ ಜ್ನಾನದ ಬೆಳಕು

ಬೇಕಾಗಿದೆ ಇನ್ನೊಂದಿಷ್ಟನು ಪಡೆಯಲು ಇನ್ನಷ್ಟು ಹುರುಪು

ಹೊಸ ಭಾವಕೆ ಕಾಯುತಿದೆ ರಾಗ

ಅರಿವೆ ನಾನು ನಿನ್ನ ಹಾವ ಭಾವವ

ತಿಳಿಯದೆ ಹೋದೆ ನಿನ್ನ ಅಂತರಾಳವ

ಹರೆಯದ ಹಾಡಿಗೆ ಇನ್ನೊಂದು ಸಾಲಾಗುತಿದೆಯಷ್ಟೆ

ಹಣೆಯ ಬರಹ ಹಳಿದರೆ ಅಳಿಯಬಹುದೆ?

ಹಾಡಾದರೂ ಸಾಲದರೂ

ಗೆರೆ ತಪ್ಪಿ ಹೋಗುತಿಹೆ

ಕ್ಷಮಿಸು ಗೆಳತಿ ನಾ ನಡೆವ ಹಾದಿಯಿದು

ನನಗೆ ತಿಳಿಯದ ರಾಗವಿದು

ಅಳೆದರೂ ಕಳೆದರೂ ರಾಗವಿಡೀ ಒಂಟಿ ಭಾವ

ಹೊಸ ರಾಗ ಸೇರಿದಾಗ ಕಳೆಯಿತಂದೆ ಒಂಟಿ ರಾಗ

ಮತ್ತದೇ ಭಾವ, ಮತ್ತದೇ ದಾಹ.

ಹೊಸ ಭಾವಕೆ ಕಾಯುತಿದೆ ರಾಗ

ಮನೆ ತೊರೆಯುತಿಹೆ ನಾನು

ಕರೆಯದೆ ಬಂದ ಅತಿಥಿ ನೀ

ಕಣ್ಣೀರಿಗೆ ಕಾರಣವಾಗಲು

ಮನೆ ತೊರೆಯುತಿಹೆ ನಾನು

ಮನದೊಳಗೆ ಮರುಗುತ

ನೀ ಮಾಯೆಯೋ ಮಾಯೆ ನಿನ್ನೊಳಗೋ

ಮರುಳಾದೆ ನಿನಗೆ ಮನದ ಮೂಲೆಯಲಿ

ಮಾತನಾಡೆಂದರೆ ನೀ ಮೌನಿಯಾದೆ

ಮನದ ಪರದೆಯ ಸರಿಸಿ

ಮನೆಯ ತೊರೆಯುತಿಹೆ ನಾನು

ಹೊಸ ಮನೆಯ ನೆನಯುತ

ಮಾಗಿದ ಮನಕೆ ಮಾಯೆಯನು ಮರೆಯಿಸುವ

ಬಲ ನೀಡೆನುತ ದೇವನ ನೆನೆದು